ÜRƏYİMƏ
Nə köhləndin!
Nə mənzillər kəsəcəkdin!
Sürüb daşa, yordum səni!
Nə çiçəkdin,
nə sinələr gəzəcəkdin!
Qönçə-qönçə yoldum səni!
Söz süfrəmdin,
Ayaqlara palaz kimi
atdım səni!
Bir qədəhə dəyməyənlər sağlığına
Qədəh kimi tutdum səni!
Nə çay idin!
Gülşənlərə axmalıykən,
Selablara sovdum səni.
Bir ildırım sürətilə yaşamağa
Yerli-yersiz
qovdum səni,
qovdum səni...
Bir ümmandın, dəniz-dəniz
satdı, ürək,
əlim səni.
Həkimlərdən, dərmanlardan
İndi gərək
Damla-damla alım səni...
1973
|
|
