DOSTLAR
Hər çətin anımda kəsin yanımı,
Axın ürəyimə gülüşlə, sözlə.
Mən öz varlığımı, öz ünvanımı
Tapıram hər yeni gəlişinizlə.
Bəzən hamarda da büdrəyir adam,
Oxuyun üzümə nə günahım var.
İttiham etsəniz güzəşt sanaram,
Güzəştə getsəniz ittiham olar.
Gözümdə, könlümdə bir qönçə kimi
Hərəniz bir duyğu bəxş edər mənə.
Ömrüm bir dolaşıq düyünçə kimi
Həmişə möhtacdır dost əllərinə.
1964
|
|
