A ZALIM...
Tanımırsan yaxın nədir, yad nədir,
Yada dostsan, dosta yadsan, a zalım!
Ürəyimdə bir günəşin odu var,
Kür quruyar, Kürə atsan, a zalım!
Dağ dayanmaz bu ağrıya, bu qəmə;
Qisasın var - al bu canım, bu qəmə.
Qəm dəryası axıtmısan sinəmə,
Bu qəsdindən yaman şadsan, a zalım!
Danışmırsan, yoxsa dildir baxışın?
Gah xəncərdir, gah da mildir baxışın.
Həm öldürür, həm dirildir baxışın.
Nə sehrigar bir cəlladsan, a zalım!
1956.
|
|
